Fimleikafréttir

Dísa skvísa er ennþá að æfa fimleika og er nú í hóp sem heitir Á-4 og með hana Dagný Stefánsdóttur sem kennara.  Skvísunni hefur heilmikið farið fram þó svo hún hafi nú misst úr þónokkuð af tímum í haust vegna lungnabólgunnar. Hún er annars búin að vera dugleg að mæta á æfingar og ekkert verið að velta fyrir sér að hætta eins og hún hefur nú stundum áður spáð í.  Hún tók þátt í æfingamóti í 6. þrepi á s.l. fimmtudag og endaði með þriðju bestu einkunina í hópnum eða samtals 60,6 stig.  Hún fékk einkunina 16 í stökki, 14,5 á tvíslá, 15,3 á jafnvægisslá og 14,8 á gólfi.  Þetta er í fyrsta sinn sem hún keppir og fær einkunnir en áður hafði hún keppt á svokölluðu dúkkumóti þar sem þær fengu stjörnur, broskalla eða thumbs-up í einkunn :-) 

Um helgina fylgdumst við mæðgur svo með henni Pálmey keppa á aðventumóti Ármanns þar sem hún stóð sig með stakri prýði ásamt öðrum Fjölnisstelpum sem sópuðu að sér verðlaunum.  Ef vel gengur áfram þá ætti Arndís að geta keppt á þessu móti að ári liðnu! Arndís fékk að kaupa sér tvíslárhlífar á sölubás sem var á mótinu og getur ekki beðið eftir að reyna þær næstu fimleikaæfingu.

Arndísi fleygir líka áfram í lestrarfærni og er núna farin að lesa hvorki meira né minna en Fíusól á flandri sem er sko bara alvöru þykk og flott bók.  Mín er komin á blaðsíðu 36 og fer bara létt með þetta!  Hún er einnig farin að verða mun vandvirkari en áður í heimalærdóminum og er næstum hætt að láta nokkuð reka á eftir sér með hann heldur bara snarar honum af fljótt og vel. 

Jæja gott af Dísinni minni í bili,
Mamman

7 ára

Já tíminn líður og ég er búin að halda uppá 7 ára afmælið mitt með tilheyrandi umstangi!  Fyrst héldum við stelpupartý fyrir bekkjarsystur mínar á sjálfum afmælisdeginum 19. mars og svo þann 20. var haldin fjölskylduveisla. Í stelpupartýinu var mikið stuð, borðuðum köku, pizzur og snakk, fórum í nokkra leiki og sungum hástöfum við lögin hans Ingó veðurguðs.  Fjölskylduveislan var aðeins rólegri en samt heilmikið skemmtileg. Við pabbi settum saman trampólínið um morguninn svo að við krakkarnir gátum verið úti að hoppa og skoppa í góða veðrinu. Ég fékk ýmislegt skemmtilegt og gagnlegt í afmælisgjöf, m.a. nýtt hjól með gírum, member áskrift að Club Penguin sem er tölvuleikur á netinu sem allt snýst um þessa dagana, svaka flotta lopapeisu, gervigrasskó, jakka, hálsmen, bækur, klukku, púsluspil, pening og margt margt fleira.

Í páskafríinu fór ég á undan mömmu, pabba og Þórunni í sveitina og gisti þar í þrjár nætur áður en þau komu. Svo gisti ég tvær nætur til viðbótar eftir að mamma og pabbi komu en seinnihlutann af fríinu erum við svo búin að vera hérna heima, enda hvergi betra í heiminum að vera :-)  Við erum búin að hoppa helling á trampólíninu, hjóla þónokkuð, fara í heita pottinn, perla, spila, horfa á sjónvarpið, þrífa hamstrabúrið, spila fótbolta o.fl. o.fl.  Alltaf nóg að gera...  Mér finnst mamma reyndar frekar löt að koma með mér á trampólínið og þar fyrir utan er hún hálf kraftlaus loksins þegar ég næt henni þangað :-)

Á morgun er svo skóli á ný eftir fríið en reyndar er ég líka að fara til tannlæknis svo ég verð ekki alveg allan daginn í skólanum.  Mér gengur bara vel í skólanum, er dugleg að lesa á hverju kvöldi og er bara orðin nokkuð sleip í lestrinum. Er farin að geta lesið eina og eina blaðsíðu í "alvöru" bókum eins og Sitji Guð Englar og Fíusól.  Ég er líka á fullu í fimleikunum og var einmitt að keppa á mínu fyrsta æfingamóti rétt fyrir páskana. Ég verð nú dálítið leið á fimleikunum inni á milli en leiðist nú samt aldrei að gera æfingar heima. Svampdýnan á stofugólfinu fær sjaldan frí þegar við systur erum heima og Þórunn reynir að sjálfsögðu að herma allt eftir mér :-)  Mamma kallar hana stundum Arndís+ svona eins og Stöð2+ :-)

Jæja, gott í bili frá mér!
Knús þar til næst!
Arndís Penguin

Vetrarfrí!

Jebb, er núna heima í vetrarfríi frá skólanum frá föstudegi og fram á miðvikudag. Fer svo aftur í skólann á fimmtudaginn endurnærð eftir fríið. Ætla reyndar að skella mér í ævintýralandið (frístundaheimilið) á miðvikudaginn og fara með því á skauta í Egilshöllinni sem verður eflaust mikið stuð.  Annars vorum við mamma bara tvær saman á föstudaginn að hafa það kósí. Settum niður haustlaukana, þrifum hamstrabúrið og fórum í fiskabúð til að kaupa tvo fiskavini fyrir fiskinn hennar mömmu í vinnunni en það var s.s. aðgerð í því að bjarga honum frá einelti sem hann var lagður í af hinum fiskunum. Því miður heppnaðist sú aðgerð ekki og blessaður fiskurinn gaf upp öndina um helgina :-(  Í dag var svo hún Elma Lísa nágrannastelpa með mér heima fyrir hádegi en ég var búin að panta að fá einhvern tíma að vera EIN í pössun með Elmu því að Þórunn er búin að vera þrisvar sinnum ein með henni en ég aldrei!  Við skemmtum okkur vel í morgun, fórum á trampólín, spiluðum og brölluðum ýmislegt. Eftir hádegi fór ég svo með pabba upp í Borgarholtsskóla þar sem ég dundaði ýmsilegt meðan hann var að undirbúa sig fyrir morgundaginn.

En já ég minntist á hamstrabúr en ég er s.s. aftur búin að eignast hamstra. Núna fékk ég tvær hamstrastelpur sem heita Ævintýra-Spretta og Regnboga-Spretta en báðar heita Spretta því þær eru sprettharðar, Regnboga-Spretta fékk sitt nafn af litnum en Ævintýra-Spretta fékk sitt nafn af endalausum ævintýrum sem hún kemur sér í.  Hún týndist t.a.m. fyrst í bílnum á leiðinni heim og var þar týnd í nærri tvo sólarhringa. Svo slapp hún út úr búrninu sama kvöld og mamma og pabbi náðu henni loksins úr bílnum. Svo sluppu þær báðar úr búrinu eina nóttina og Ævintýra-Spretta var aftur týnd í nærri tvo sólarhringa. Vonandi er nóg komið af ævintýrum hjá henni í bili en við búmst samt við öllu.

Í gær fórum við mamma ásamt vinkonum mömmu og skvísunum þeirra á skemmtilega sýningu Íslenska Dansflokksins í Borgarleikhúsinu. Sýningin var alveg ferlega skemmtileg og þar að auki hitti ég eina uppáhalds frænku mína þar, hana Ásthildi Sóllilju og svo hitti ég líka fimleikaþjálfarann minn hana Höllu Karí og allar K-1 stelpurnar hennar úr fimleikunum. Eftir sýninguna fórum við svo á kaffihús og fengum okkur köku og kakó og þar á eftir fór mamma með mig og Heklu Maríu í Krakkahöllina þar sem við fengum að hoppa úr okkur alla orkuna sem eftir var :-)

Jæja, gott í bili af mér.
Bestu kveðjur,
Arndís

Sveitaskvísur!

Já núna erum við systur loksins sofnaðar eftir skemmtilega helgi í sveitinni en við fjölskyldan skelltum okkur s.s. vestur í smalamennskur í gær og vorum svo í réttum í dag.  Arndís, sem er orðin nokkuð sjóuð hestakona eftir tvö reiðnámskeið í sumar, reið Draumi gamla eins og herforingi, fyrst í aukataumi hjá mömmu niður götuna af Glerárskógafjallinu en svo bara alein þegar komið var niður á eyrar.  Þórunn vildi að sjálfsögðu líka fara á hestbak og fékk að sitja fyrir framan mömmu á Surti gamla. Hún var lítið hrifin af því að vera kjur og kallaði því alltaf "áfram áfram" ef henni þótti vera of hægt farið.  Mamma og pabbi klikkuðu alveg á myndatöku af duglegu hestastelpunum en við bindum vonir við að fá myndir frá frænkum sem tóku myndir af okkur.  Svo fengum við líka að "óþekktast" heilmikið í bílnum í fjörunni á leiðinni í réttirnar. Engin belti, setið frammí og fengið að stýra og allt hvaðeina sem venjulega er auðvitað harðbannað! Þórunni þótti skemmtilegast að keyra í pollana á sjá gusuganginn.  Við systur gistum svo heima hjá Sóley og fjölskyldu í nótt, mamma og pabbi skruppu á ball í þarnæsta húsi og skriðu svo uppí hjá okkur um miðja nótt. Við aumkuðum okkur nú aðeins yfir þau í morgun og vöknuðum ekki fyrr en hálf átta svona svo þau fengju nú smá lúr.  

Í dag var svo leiðindarveður framan af réttinni, rigning og frekar kallt. Við drifum okkur þó öll sömul í almenninginn og drógum nokkrar kindur en Þórunn varð svo fljótlega þreytt á þessum barningi og þær mamma fóru bara inní bíl að stússast.  Arndís fékk svo að fara með ömmu Jóhönnu og Andreu að í bílinn að keyra kindurnar heim á meðan mamma og Þórunn keyrðu á eftir rekstrinum þeirra Önnu og Lolla á neðri bænum eftir fjörunni. Það var svo þreytt og lúin fjölskylda sem kom loksins heim til sín um kl. 18 í dag. Arndís og mamma reyndar sváfu nú mestalla leiðina en Þórunn og pabbi voru með aðeins meiri meðvitund :-)

Annars höfum við bara haft það mjög gott undanfarið. Um síðustu helgi vorum við systur í pössun eina nótt í Breiðuvíkinni meðan mamma og pabbi fóru á árshátíð Betware á Selfossi. Ásta systir kom líka í heimsókn í bæinn og við náðum aðeins að knúsa hana. Arndís var afskaplega leið þegar Ásta var farin heim og fór að gráta af söknuði. Mamma benti henni á að skrifa Ástu nú bara bréf og senda henni í pósti sem og hún gerði.

Arndísi gengur bara vel í skólanum. Núna er hún byrjuð að fá smá heimavinnu sem gengur misvel að finna tíma fyrir. Hún er jú í fimleikum bæði á miðvikudögum og föstudögum og svo þarf að leika við vinkonurnar og vinina auk annars sem til fellur. Við þurfum því að vera dugleg að skipuleggja eftirmiðdagana hjá okkur svo að allt gangi nú upp.  Arndís er líka að læra á fiðlu sem hún þarf helst að æfa sig á á hverjum degi og svo er nú talsverð vinna að eiga litla systur sem er ekki hægt að stóla á að sé alltaf stillt og prúð eftir pöntunum :-) 

Þórunni líkar mjög vel á leikskólanum og mamma hefur engar áhyggjur af því að það breytist meðan hafragrauturinn og rúsínurnar verða ekki skornar niður í öllum niðurskurðinum :-)  Þórunn nefninelga elskar hafragraut með rúsínum og getur endalaust borðað hann.  Þórunn veit fátt skemmtilegra en að fara í sturtu og gerir það helst á hverjum degi ef hún fær tækifæri til.  Hún dundar sér þar tímunum saman og syngur og bullar heilu einræðurnar. Hún er farin að syngja heilmörg lög sem hún er greinilega að læra á leikskólanum þó svo hún sé nú lítið farin að fást til að syngja með þar.  Við erum búin að heyra hana syngja Guttavísur, Kalla litla Kónguló, Tombæ, Meistara Jakob og Krumma krunkar úti sem eru allt lög sem við höfum ekkert verið að syngja fyrir hana hérna heima.

Jæja, gott í bili af okkur systrum.
Bestu kveðjur,
Sveitaskvísurnar Arndís og Þórunn

Arndís í dag!

Undanfarna daga er ég búin að vera velta því mikið fyrir mér af hverju sumir komast í fréttirnar en aðrir ekki. Ég fletti fréttablaðinu og yfirheyri pabba og mömmu hvað hinir og þessir sem eru á myndunum hafa unnið sér til frægðar til þess að koma í blaðið. Skil ekki af hverju það er aldrei neinn úr fjölskyldunni okkar sem er í fréttunum, alltaf bara einhverjir aðrir og oft ekki fyrir mjög markverða hluti að mér finnst.  Í dag get ég hins vegar ekki lengur kvartað þar sem mín var sko í sjónvarpsviðtali í Íslandi í dag! Á mánudaginn fór ég nefninlega ásamt leikskólafélögum mínum í fjallgöngu á Esjuna. Þegar við komum niður af fjallinu tók sjónvarpið á móti okkur, tók myndir og viðtöl og þar á meðal við mig.  Tilefnið var stofnun ferðafélags barnanna sem var einmitt í gær.

Annars er allt fínt að frétta af okkur. Hin framtönnin í neðri góm datt aðeins örfáum dögum á eftir þeirri fyrstu og fullorðinstennurnar eru strax farnar að kíkja upp.

Á 17. júní fórum við mamma niður í bæ til að fylgjast með hátíðarhöldunum. Við sátum í þrjá klukkutíma á Arnarhólnum og fylgdumst með skemmtilegri dagskrá.

Um helgina fórum við systur með Auði í sveitina þar sem við eyddum helginni með fjölskyldunni meðan mamma og pabbi fóru til Akureyrar þar sem pabbi var að keppa í rallýkrossi. Við höfðum það voðalega gott, lékum við kanínuungana hennar Elvu Marínar, fórum í heita pottinn hans afa og fórum í fermingarveislu til Lísu Margrétar á sunnudeginum.

Ég er nýbúin með 10 daga pensillínskammt sem ég fékk af því að ég var komin með streptókokkasýkingu í hálsinn. Nefkvefið mitt lætur hins vegar ekkert stoppa sig og er búið að standa yfir látlaust síðan 4. janúar.  Næst á dagskránni er heimsókn til háls- nef og eyrnalæknisins míns sem vonandi getur eitthvað gert fyrir mig.

Gott í dag,
Bestu kveðjur,
Arndís fjallgönguskvís

Fyrsta tönnin dottin!

Í gær voru Auður frænka og Gummi frændi að passa okkur systur meðan að mamma og pabbi fóru í grillveislu hjá fimleikadeildinni. Auður manaði mig uppí að kippa tönninni bara úr enda var hún orðin alveg laflaus. Ég tók mig því bara til og kippti henni úr og hef svo brosað út að eyrum síðan!  Áður en Auður gat einu sinni stungið upp á því að finna einhverja dollu undir tönnina var ég búin að hlaupa með hana inn í herbergi og setja hana undir koddann. Í morgun þegar ég vaknaði var svo tönnin á bak og burt og kominn 100 kall í staðin!

Annars er lítið að frétta annað en að ég er komin á sýklalyf vegna streptókokkasýkingu sem ég er komin með. Ég fór líka í myndatöku út af öllu horinu sem er búið að vera að angra mig í 5 mánuði en engin merki um sýkingu í kinn- eða ennisholum fundust. Vonandi samt að sýklalyfin hjálpi eitthvað til með þetta.

Svo er stefnan tekin út úr bænum í fyrstu fellihýsaferðina um helgina. Vonandi að það verði skemmtilegt!

Bless bless,
Arndís tannlausaskvís

Laflaus tönn!

Loksins loksins er fyrsta tönninn að fara að detta. ALLIR í leikskólanum eru búnir að missa tönn nema ég (byrjar snemma þessi frasi) en núna er önnur framtönnin í neðri góm orðin laflaus og virðist ætla að detta á næstu dögum.

Síðustu viku var ég á Úlfarsfelli en það er ný deild á leikskólanum sem er bara fyrir okkur stóru krakkana. Okkur er s.s. skipt í tvo hópa og erum viku og viku til skiptis á Úlfarsfelli sem er salurinn okkar í leikskólanum.  Í sumar verðum við elstu börnin á flandri um allan bæ og erum þegar búin að fara í heimsókn í Sorpu til að læra um allt sem fer fram þar. Við fengum í heimsókninni gefins svona samstæðuspil með trjáálfunum sem eru stundum í Stundinni Okkar en þeir vita nefninlega svo mikið um alls konar endurvinnslu og sniðuga hluti.

Um helgina smelltum við okkur í sveitina og ég fór á hestbak á hana Perlu mína (eða sko ömmu Perlu öllu heldur). Í dag fórum við svo í húsdýragarðinn og þar sá ég krúttlegasta selinn sem ég hef nokkurn tíma séð en það var pínulítill kópur sem fæddist bara stuttu áður en við komum í garðinn. Sá var krúttlegur og duglegur, var bara strax búinn að læra að kafa og synda og allt saman! Þurfti ekki einu sinni sundnámskeið...

En nóg í bili,
Sumarkveðja,
Arndís bráðum Tannlausaskvís

Fréttir mánaðarins...

Úff það líður orðið allt of langt á milli þess sem mamma nennir að skrifa orðið. Veit ekki hvernig þetta verður þegar veðrið verður enn betra en það hefur verðið undanfarið. 

Það hefur ýmislegt markvert drifið á daga okkar undanfarinn mánuðinn en ekki víst að allt hafi fests í ritaraminninu. Þurfum að fara að kaupa fyrir hana svona diktafón til að taka niður punkta :-)  Ég til dæmis strauk heim úr leikskólanum einn mánudaginn. Vissi af mömmu heima með Þórunni sem var lasin og mætti bara til hennar eftir hádegið rennandi blaut og skítug upp fyrir haus eftir að hafa troðið mér undir girðinguna í útiverunni.  Þetta tókst mér að gera óséð og var enginn farinn að sakna mín þegar mamma hringdi í leikskólann til að láta vita af mér.  Ég var svo tekin úr blautu fötunum og þurfti svo að vera inni í herberginu mínu þar til Þórunn vaknaði því mamma gat auðvitað ekki farið að vekja hana til að fara með mig aftur í leikskólann. Það duttu margir gullmolar upp úr mér þennan daginn enda var ég mjög meðvituð um að það sem ég var að gera var ekki leyfilegt og að ég yrði að taka út mína refsingu. "Mamma, ég verð örugglega rekin úr leikskólanum", var eitt gullkornið, tónninn ekki alveg eins og ég væri beint mjög leið yfir þessum hugsanlegu örlögum mínum.  "Mamma, þá er víst engin tölva í dag", eitthvað sem ég hafði heyrt hjá stóru frænku sem er líka stundum óþekk :-)  En þegar Þórunn vaknaði fórum við mæðgur allar þrjár í leikskólann þar sem ég bað hana Eddu deildarstjóra afsökunar og lofaði að gera þetta aldrei aftur. Ég fór líka með henni og sýndi henni hvar ég hefði skriðið undir til að það væri nú hægt að laga það áður en fleiri færu að stinga sér þarna undir.  Þetta varð að sjálfsögðu mikið umtalsefni í leikskólanum en sem betur fer hefur enginn reynt að leika þetta eftir.

Ég útskrifaðist svo formlega úr leikskólanum fyrir nokkrum dögum. Ég er nú samt ekki alveg hætt ennþá en það styttist jú í það!  Við erum einmitt á leiðinni í skólaheimsókn með foreldrum á mánudaginn en þá fáum við krakkarnir að hitta kennarann okkar og foreldrarnir hitta skólastjórann.

Ég er svo ennþá með "hor niðrá tær" eins og mamma kallar það. Það ætlar ekkert að gefast upp fyrir vorinu þetta hort mitt þrátt fyrir alls konar tilraunir til að losna við það.  Það eykst alltaf alveg greinilega þegar ég er mikið úti og þessa dagana er ég nú bara helst úti allan daginn svo að það hjálpar nú sennilega ekki til. Þetta HLÝTUR bara að fara að lagast, fimm mánuðir með hor niður á tær er meira en nóg! 

Við mamma skelltum okkur á listahátíð í miðbænum um síðustu helgi og sáum þar ýmislegt skemmtilegt. Skemmtilegast þótti mér að sjá Áströlsku brjálæðingana sem dönsuðu upp á stöngunum sem sveifluðust fram og til baka. Við sáum líka atriði frá ýmsum löndum í Ráðhúsinu en þar var svona fjölmenningarhátíð þar sem við mamma vorum held ég eiginlega einu Íslendingarnir :-)

Á sunnudeginum fórum við svo í sveitaferð að Grjóteyri og skoðuðum alls konar skemmtilegt ungviði. Kettlinga sem voru algjör krútt, lömb, hvolpa, hænuunga, kálfa, folald og kiðlinga. Og svo auðvitað fullorðnu dýrin en fæstir tóku nokkuð eftir þeim innan um öll krúttin. Svo voru grillaðar pylsur og leikið í leiktækjunum og dráttarvélunum.

Á fimmtudaginn tókum við svo þátt í Korpuhátíðinni sem var haldin í Korpuskóla sem á einmitt líka 10 ára afmæli. Ég knúsaði skólann til hamingju með afmælið, skoðaði hann allan í krók og kima, fékk mér grillaða pulsu, horfði á leiksýningu, lék í leiktækjum, tefldi eina skák við mömmu o.fl. o.fl. Mjög skemmtileg hátíð í frábæru veðri. Við mamma og Þórunn röltum/hjóluðum svo yfir í Víkurhverfi til ná í hápunktinn á Víkurhátíðinni en þangað kom hann Ingó sjálfur og tók nokkur lög fyrir skarann við mikinn fögnuð. Ég fór svo og fékk hjá honum eiginhandaáritun á eftir og var mikið kát með hana.

Jæja, kominn háttatími hjá ritaranum.
Bless í bili,
Arndís Grallaraskvís