VOGIN
23. september - 22. október

Árstími Vogarinnar er haustið, þegar litir eru sterkir í náttúrunni og sumarið og uppskeruvinnan er að baki. Veður eru enn ágæt og því góður tími til að sinna félagslífi. Fyrsti mánuður haustsins er því rómantískur og það fólk sem fæðist í Vogarmerkinu þykir ljúft, listrænt og félagslynt. Jafnvægi og réttlæti Til að skilja Vogina þarf að horfa á 'symból' merkisins, vogina sem vegur og metur. Ef of mikið er sett á aðra skálina þá hallar vogin og allt fer í voða. Enda er það oft svo að fólk sem fæðist í þessu merki hefur sterka réttlætiskennd. Það er alltaf að leita að jafnvægi, leita að því sem stillir vogina af. En þetta er hægara sagt en gert, og því geta Vogir sveiflast til. Erum stundum eftirgefanlegar, stundum harðar, stundum ljúfar, stundum hrjúfar. Þetta er leit að jafnvægi, að 'balance'. Sumar Vogir eru vel stilltar, aðrar sveiflast stöðugt frá einum pól til annars, eru 'brokkgengar' eins og einn ágætur maður sagði. Ljúf samvinna Það sem einkennir framkomu Vogarinnar, eða það sem hún reynir að láta birtast útávið, er ljúfleiki. Öðrum megin á skálinni er ég-ið og hinum megið er þú-ið. Þetta er spurning um jafnvægi á milli mín og þín. Jafnvægi og samvinna er það sem Vogin er að leitast eftir og því reynir hún að koma vel fram við aðra. En ef hún fær ekki sínu framgengt með ljúfleika, brosi og sannfæringarkrafti, þá á hún vissulega til að valta yfir umhverfið. Það er því oft talað um hina 'ljúfu frekju'. En vissulega vill Vogin vera fáguð, kurteis og yfirveguð. Fegurð Stjórnandi Vogarinnar er Venus og 'elementið' er loft. Venus er pláneta fegurðar og samvinnu, og loftið er táknrænt fyrir rökhugsun. Vogir eru því oft félagsmálamenn, listamenn, pælarar og pólitíkusar. Stundum sameinast þetta allt í einum og sama manninum. John Lennon var listamaður sem barðist fyrir réttlæti. Jóhanna Sigurðardóttir er pólitíkus sem berst fyrir réttlæti. Friðrik Sophusson er pólitíkus, hann virðist ekki berjast fyrir neinu sérstöku, en hann er vissulega greindur og fágaður, kurteis og hæfileikaríkur félagsmálamaður. Vog sem virðist í góðu jafnvægi. Það sem örvar Vogina Að lokum, má segja að Vogin þurfi til að endurnýja og viðhalda lífsorku, að dvelja í félagslega og hugmyndalega lifandi umhverfi. Það þýðir að Vogin þarf að hitta fólk sem örvar hugsun hennar. Hún þrífst illa í einangrun og andlegu tómarúmi. Tapar orku. Vogin þarf á fólki, félagslífi, ást og náinni samvinnu að halda. Umhverfið þarf helst að vera fagurt, listaverk, málverk, litaharmónía og fallegir tónar. Kurteis umræða og fágað orðbragð. Jafnvægi og réttlæti. Rétt stilltar skálar.