10 ára afmæli englaprinsessunnar....

10 ár eða heill áratugur síðan ég fékk þig í fang mitt elsku barnið mitt, mikið vorum við foreldrar þínir stolt og erum enn. Við áttum ekki von á því að eignast stúlkubarn en hvað þá svona gullfallega stúlku. Þú varst með svo fallegt dökkt hár og þessi líka dökku augu sem bræddu mann alveg. Þennan dag skein vetrarsólin skært eins og veðrið var í dag.

Mikið hefur nú breyst í lífi okkar pabba þíns síðan þá, við búin að eignast þrjú börn, Dag Þór og svo nú í ár tvíburasystur þínar Ölmu Hrund og Diljá Hrund. Okkur pabba þínum fannst ekki annað hægt en að þær fengju millinafn þitt til að halda því á lofti. Mikið minna þær okkur á þig hvern einasta dag en söknuðurinn til þín hverfur aldrei. Erfitt er að hugsa til þess að þær fái ekki að kynnast þér í eigin persónu hetjunni okkar en við munum gera eins og við getum til að þær fái að kynnast þér eins og við höfum gert við Dag Þór sem grætur stundum áður en hann fer að sofa yfir því að hafa aldrei hitt þig. Við gerum hvað við getum á hverjum degi að systkin þín viti af þér og þekki enda ertu svo stór þáttur í lífi okkar.

Í dag hittumst við upp í kirkjugarðigarði með ömmu Ásu, Rúnar afa, börnum og barnabörnum þeirra, tekin var mynd af þeim með öllum barnabörnum þeirra og varst þú og Sindri Þór þar með líka.

Mikið var leiðið ykkar fallegt fullt af bleikum rósum, kertum og litlum englum. Eftir veru okkar hjá ykkur systkynunum fórum við heim til að borða bleika köku og bollakökur með bleiku kremi til að minnast þín enda ekki hægt annað en að minnast fallega engilsins okkar. Alla amma og Gunni afi komust því miður ekki þar sem þau voru stödd í London en í staðinn fór Alla amma með fallegar 10 rósir til þín á fimmtudaginn.

Elsku fallega englahetjan okkar innilega til hamingju með daginn þinn, við pabbi þinn erum endalaust stolt yfir að hafa fengið að vera foreldrar þínir og gerðir þú okkur að betra fólki. Þú munt alltaf eiga stórt pláss í hjörtum okkar sem enginn mun fylla.

Ástar- og saknaðarkveðjar mamma, pabbi, Bjartur Þór, Dagur Þór, Alma Hrund og Diljá Hrund.

Elsku fallega englaprinsessan mín, innilega til hamingju með daginn þinn.

Það er ótrúlegt að 9 ár séu liðin frá því við pabbi þinn tókum á móti þér á þessum líka fallega og bjarta degi eins og dagurinn í dag var. Stoltið skein úr okkur foreldrunum að hafa getið svona fallegri stelpu sem brosti út í eitt. Litla hetjan okkar, enn erum við stolt að hafa fengið að hafa þig hjá okkur þó svo það hafi verið allt of stutt en þú gafst okkur svo mikið engillinn minn.

Í dag fórum við Bjartur Þór, Dagur Þór, ömmur og afar upp í garð til ykkar systkinanna og settum blóm og kerti, mikið var það falleg stund enda veðrið eins og á deginum sem prinsessan okkar fæddist. Pabbi komst því miður ekki þar sem hann er með Jóa í Kóreu á HM móti, mikið fannst honum erfitt að vera svo langt í burtu frá fjölskyldunni á þessum degi en svona er lífið það heldur áfram. Eftir þessa fallegu stund upp í garði hjá ykkur Sindra Þór fórum við heim og drukkum kaffi með bleikri köku sem ég og Dagur Þór bökuðum í tilefni afmælisdagsins, ekki hægt annað en að minnast hans þar sem þessi dagur var þvílíkur gleðidagur í lifi okkar fyrir 9 árum. Við söknum þín endalaust og ertu þú í huga okkar allra alla daga elsku prinsessan okkar.

Takk elsku prinsessan okkar fyrir að velja okkur sem foreldra þína við munum alltaf minnast þín í hjörtum okkar.

Ástarkveðja mamma, pabbi, Bjartur Þór og Dagur Þór

Enn eitt árið liðið og margt búið að gerast í lífi okkar á þessu ári. Þú og bræður þínir eignuðust bróður sem fékk nafnið Sindri Þór, en ekki fengum við að hafa hann hjá  okkur frekar en þig og því liggur hann nú hjá þér í Gufunesinu. Við vitum að þú passar hann fyrir okkur enda svo dugleg stelpa. Það er ótrúlegt að hugsa til þess að 7 ár séu liðin frá því við héldum þér í síðasta sinn í fangi okkar, tíminn líður en aldrei skal þetta verða auðvelt. 7 ár er langur tími en þegar maður hugsar til þessa tíma þá er svo stutt síðan við gengum þessa þrautagöngu með þér.

Við fjölskylda fórum upp í garð ásamt ömmum og öfum í kvöld, settum blóm og kerti á leiðið ykkar systkinanna. Mikið hefur allt blómstrað þar í sumar, blómin sem við plöntuðum í vor eru svo falleg enn í dag og september kominn.

Lífið heldur áfram og söknuðurinn enn mikill, við höldum áfram enda ekki hægt neitt annað  því þú kenndir okkur að brosa framan í lífið þó svo það væri ekki auðvelt en það auðveldar svo margt að geta brosað og það kenndir þú okkar, prinsessan okkar!!

Elsku besta, fallegasta prinsessu stúlkan okkar, við elskum þig óendanlega og söknum þín.

Knús og kossar

Mamma, pabbi, Bjartur Þór og Dagur Þór

Forsíða

Til minningar um:

Dagmar Hrund englastelpu

 



Ég heiti Dagmar Hrund og fæddist á Landspítalanum þann 23. október 2001. Ég var 14 merkur eða 3500 gr. og 52 cm. Ég var með mikið dökkt hár og stór dökk augu sem eru orðin blá í dag. Ég bý í Kópavogi með fjölskyldu minni. Mamma mín heitir Bryndís og pabbi minn Helgi Þór, svo á ég líka stóran bróður sem heitir Bjartur Þór, hann á líka heimasíðu hér á barnalandi endilega skoðið hana líka.

 



Þann 22. janúar 2002 greindist ég með Hvítblæði. Ég lá inni á Landsspítalanum í svolítinn tíma eftir að ég greindist en var svo dugleg að ég var send heim og hef bara þurft að fara upp á spítala þá daga sem ég hef þurft að fá lyf eða til að fara í blóðprufu, hef því getað sofið heima í rúminu mínu. Ég er núna farin að borða ýmsan mat en er samt enn á brjósti svona með, (mér finnst nefninlega brjóstið mitt svo gott). Ég er með svokallaðann lyfjabrunn á bringunni og þar fæ ég lyfin mín svo ekki þurfi að leita að æð í hvert skiptið sem nál er sett upp hjá mér. Ég er á miklum lyfjum og hjálpa mamma mín og pabbi mér að taka sum þeirra heima en önnur þarf ég að fá á spítalanum því þau þurfa að fara beint inn í blóðið mitt. Meðferðin sem ég er í tekur rúmlega 2 ár og er ég því einungis búin með 1/4 af henni núna. Ég hef staðið mig mjög vel hingað til og líður mjög vel þrátt fyrir allt þetta.







Kíkið endilega ávefdagbók mína, þar er að finna allt það nýjasta!



Það væri líka voða gaman að ef þið sæjuð ykkur fært að kvitta í



gestabók mína.



Endilega sendið mér póst ef ykkur langar



.







Þið getið líka skoðað síður bræðra minna
Bjartur ÞórDagur Þór
með því að smella á nafn þeirra!!!








Kveðja Dagmar Hrund 

6 ár í dag....ótrúlegt en satt þá líður tíminn.

Við fórum eins og vaninn er á þessum degi upp að leiði þínu og settum ný blóm. Ömmur þínar, afar, frænkur og frændur og Helga Sifin okkar mættu eins og alltaf og fylltu leiðið af rósum.....mikið er nú gott að eiga svona gott fólk að. Allir sakna þín svo mikið og finnst það tilheyra að fá að koma til þín á þessum degi.  Dagur Þór vildi endilega fá að kveikja á kertinu enda tilheyrir það þegar komið er til þín.

Við söknum þín ofsalega og skilur maður ekki hvernig lífið heldur áfram en það gerir það og erum við viss um að það sé þér að þakka, þú fylgir manni áfram gegnum lífið. Við erum óendanlega þakklát fyrir að hafa átt þig og lærðum mikið af þér.

Elsku engillinn okkar elskum þið óendanlega.

Knús og kossar

Mamma, pabbi, Bjartur Þór og Dagur Þór