Það er víst ekki seinna vænna að uppfæra fréttir frá því í ágúst á síðasta ári enda er amma óþreytandi að benda mömmu á slóðaskapinn. Það hefur ýmislegt á dagana drifið og margt fallið í gleymsku en það sem stendur upp úr hjá mér er að ég er byrjuð í fimleikum hjá Ármanni eins og stóri bróðir og er byrjuð að læra að lesa.  Ég stækka jafnt og þétt án þess að taka neina stóra kippi (við erum bæði svoleiðis systkinin) og er orðin tæplega 103 cm og 16,7 kg. Frekar nett en bara fín finnst okkur öllum.  Mér finnst líka flestur matur góður og geri honum góð skil á leikskólanum. Leikskólinn er alltaf skemmtilegur og mikið um að vera þar, ég er núna á rauðu deildinni og mamma var að hrökkva upp við þá staðreynd að næsta haust byrja ég síðasta leikskólaárið mitt og verð í skólahóp þann veturinn. Allt að gerast. Ég hlakka óstjórnlega til sumarsins, er alltaf að spyrja mömmu hvort það sé NÚNA komið enda orðin þreytt á endalausum útigöllum og þykkum ullarhúfum (svo ekki sé minnst á hor og hósta). Núna er ég til dæmis lasin heima með mömmu, fékk 40,5 stiga hita í fyrrakvöld og hor, svipað í gær en er að hressast núna og er hitalaus. Svona er þetta stundum. Ég held að þetta sé þriðja skiptið í vetur amk. sem ég fæ svona. En ég hristi þetta fljótt af mér. Annars er allt gott að frétta af öllum, Helgi bróðir sprækur í Laugalækjarskóla(hann á sjálfur síðu en vill ekki lengur að mamma skrifi fréttir þar enda hálffullorðinn), Dimma spræk á virðulegum aldri sem og foreldrarnir. Meira síðar, Margrét Áslaug

Jæja, þá er ég orðin 4 ára. Ég hélt upp á afmælið mitt um síðustu helgi  við mikið fjölmenni og skemmti mér konunglega. Ég fékk fína prinsessuköku og eplakastala, pönnukökur og fleiri kökur og alls konar fínerí. Svo fékk ég náttúrulega frábærar gjafir, leikföng, náttföt, marga prinsessubúninga og prinsessudót, peninga, sparibauk, stuttermabol, teiknimyndir, skartgripaskrín og ég veit ekki hvað og hvað. Frábær dagur. Á föstudaginn var hélt ég afmæli á leikskólanum, það var síðasti dagurinn minn á Gulu deildinni því nú er ég byrjuð á Rauðu deildinni og finnst það frábært. Aðlögunin gekk eins og í sögu og mér líður bara vel þar.

Í dag fór ég svo í 4 ára skoðun. Hún gekk ágætlega þótt feimnin hafi aðeins hamlað mér á tímabili. Ég fór í sjónpróf, þar kom í ljós að sjónin er ágæt en samt einhver lítilsháttar munur á augunum sem gæti bent til vægar sjónskekkju. Það þarf aðeins að skoða það þegar ég fer í skóla.  Ég var líka hæðarmæld og vigtuð, ég er núna sléttir 100 cm á hæð og tæplega 16 kg. Ég var alltaf einu striki undir kúrfunni /meðaltalinu, létt og lítil en er núna hálfu striki undir enda finnst mömmu ég hafa braggast mikið síðasta árið. Það hefur líka verið minna um veikindi á mér, ég stend alltaf í stað í þyngd þegar ég veikist. Svo gerði ég alls konar þrautir fyrir hana Steinunni sem skoðaði mig  sem gengu yfirleitt vel, hoppaði á öðrum fæti og gekk eftir línu, benti á ýmsa líkamshluta og þekkti alla litina. Svo í lokin fékk ég sprautu og bar mig eins og hetja, fór ekkert að gráta þótt það hafi verið ansi sárt. Plásturinn með broskallinum bjargaði nú ýmsu. Bless í bili. M.Á. 4 ára afmælisprinsessa.

Góðan daginn. Þið voruð búin að gefast upp á þessari vefdagbók er það ekki? Héðan úr Laugardalnum er allt gott að frétta. Sumarið hefur liðið í miklum vellystingum, ægilega hlýtt eins og allir vita og við eyddum miklum tíma í garðinum, okkar og ömmu, í sundferðum og heimsóknum og alls konar þvælingi. Ég skrapp með pabba á ættarmót á Hvanneyri og hef almennt skemmt mér vel í sumar. Í dag byrjaði svo leikskólinn svo aftur eftir sumarfrí og í næstu viku flyst ég upp um deild. Jább, svona er ég orðin stór enda 4 ára afmælið alveg að skella á. Helstu áhugamál þessa dagana eru prinsessur, helst Disney prinsessur og almenn prinsessufræði, bókalestur, hundapössun, sápukúlur og mikið af þeim, bleikir kjólar í bland við sverð og skylmingar ýmis konar og mikill söngur inn á milli. Mamma spáir karríer á söng- og leiksviði enda leik ég með öllum dvd myndum sem ég horfi á. Einkum prinsessumyndum á borð við Mjallhvíti og Prinsessuna og froskinn eðli málsins samkvæmt, þetta liggur nú á mínu sérfræðisviði.  Ég kem með meiri fréttir eftir afmælið. kv. Margrét Áslaug